IG-verbo el IGX-verbo «

Principe oni tute rajtas aldoni IG al verbo kun IGX-sufikso. La senco de tia IG-verbo estas kauxzado de tiu ago, kiun esprimas la IGX-verbo: Li [= Dio] senkuragxigas la cxefojn de la popolo de la lando [...] Kaj Li sxanceligxigas ilin kiel ebriuloj.Ij.12 = Li igas ilin sxanceligxi kiel ebriuloj. La cxefoj sxanceligxas. Dio kauxzas tiun sxanceligxadon. En la praktiko tiaj IG-verboj tamen estas ekstreme maloftaj.

Iafoje oni faras IG-verbon, kiu lauxsence estas bazita sur IGX-verbo, sed kiu tamen ne enhavas IGX. Oni povas diri, ke IGX estas ellasita por simpligi la vorton: Rajdmilicanoj formovigis la publikon. = ...formovigxigis la publikon. = ...igis la publikon formovigxi. Oni trovas tian uzon ankaux cxe Zamenhof: Ili ruligu min kiel kortegan kurieron.Rz.68 = Ili igu min ruligxi. / Ili igu mian kalesxon ruligxi. Ankaux tiaj IG-verboj estas tre maloftaj. Ili povas esti miskomprenataj. Vidu tuj cxi-poste pri la ordinara uzo de IG post objekta verbo.

Oni notu la subtilan diferencon inter formovi kaj formov(igx)igi. Se oni formovas ion, oni mem rekte plenumas la movadon. Se oni formovigxigas ion (igas ion formovigxi), la kauxzado estas malpli rekta. Oni iel influas ion por ke tio mem movigxu. En la cxi-antauxa ekzemplo kun rajdmilicanoj, la milicanoj kredeble ne propramane movis la publikon, sed per timigado aux simile igis la publikon mem movigxi for. Simile subtila estas la diferenco inter sxanceli kaj sxanceligxigi en la cxi-antauxa Zamenhofa ekzemplo. En la praktiko oni preskaux cxiam preferas uzi igi kiel memstaran verbon por esprimi tiajn sencojn: Li igas ilin sxanceligxi. / Rajdmilicanoj igis la publikon formovigxi. Tio estas plej ofte rekomendinda, cxar multe pli klara.